اللغة العربية أصبحت واحدة من أسرع اللغات نمواً في العالم وفيه طلب على تعلم اللغة العربية أكتر من أي وقت فات. أنا شخصياً لامس ده في شغلي بشكل واضح. كل يوم بيجيلي طلبات من طلاب جُداد عايزين يدرسوا معايا، ولكن بسبب وقتي المحدود بقيت مش بعرف أقبل كل الطلبات. بقالي ٣ سنين بشتغل كل يوم بدون أيام إجازة وساعات بشتغل أكتر من ٨ ساعات في اليوم. أتمنى ده يوضحلك حجم الشغل عامل إزاي.

تدريس اللغة العربية شغلانة هتديك الحرية إنك تشتغل من أي مكان في العالم، وشغلانة هتخليك أنت الوحيد اللي مُتَحَكِّم في جدولك، ووقتك، وساعات شغلك، سواء عايز تشتغل Full time أو عندك شغلانة أساسية وحابب تِدَرِّس على جنب وتعمل فلوس زيادة. ده غير كمان إنها شغلانة هتقبض فيها بالدولار، وفي ظل الأزمة الاقتصادية العالمية الحالية، ده لازم يكون هدف أساسي عندك لأن الموضوع مبقاش رفاهية. 

بجانب كل ده فهي شغلانة سهل تتعلمها وتبدأ فيها. كل اللي محتاجته هي شوية مهارات شخصية، ومنهج قوي وواضح تدرِّسُه للطلاب، وده بالظبط اللي بعمله معاك في الكورس. 

في الكورس ده، بعلمك كل المهارات اللي محتاجها عشان تعرف تتواصل مع الطالب الأجنبي، وبنقلك المنهج اللي طورته على مدار السنين اللي فاتت من شغلي كمدرس عربي للأجانب، واللي بستخدمه شخصياً مع كل طلابي. بنقلك كل كلمة بالعربي والإنجليزي، بحيث إنك لو معندكش أي خبرة تماماً في تدريس اللغة العربية، تقدر تخلص الكورس ده وتشتغل مدرس عربي للأجانب من تاني يوم، وكمان تنافسني في شغلي!